વડોદરા શહેરના તમામ ટ્યુશન(tution) અને કોચિંગ કલાસિસ તાત્કાલિક અસરથી બંધ
વડોદરા શહેરના તમામ ટ્યુશન (tution)અને કોચિંગ કલાસિસ તાત્કાલિક અસરથી બંધ કરાવવામાં આવશે: કૉવિડ ગાઈડ લાઈનનો સઘન અમલ કરાવવામાં આવશે
વડોદરા, ૧૮ માર્ચ: ખાસ ફરજ પરના અધિકારી અને શિક્ષણ સચિવ ડો.વિનોદ રાવે મ્યુનિસિપલ કમિશનર શ્રી પી.સ્વરૂપ અને મહાનગર પાલિકાના આરોગ્ય અધિકારીઓ સાથે બેઠક યોજીને શહેરમાં કૉવિડ વિષયક પરિસ્થિતિની વિગતવાર સમીક્ષા કરી હતી. તેમણે જણાવ્યું કે હાલની પરિસ્થિતિને અનુલક્ષીને શહેરના તમામ ટ્યુશન (tution) અને કોચિંગ ક્લાસિસને તાત્કાલિક અસરથી બંધ કરાવવાનો નિર્ણય લેવામાં આવ્યો છે.
હાલમાં વડોદરાના દવાખાનાઓમાં કોવિડના ૨૨૦૦ જેટલા દર્દીઓ સારવાર હેઠળ છે એવી જાણકારી આપતાં તેમણે જણાવ્યું કે હાલમાં આપણી સારવાર ક્ષમતા અંદાજે ૪૫૦૦ બેડની છે. વેન્ટિલેટર પૂરતા પ્રમાણમાં ઉપલબ્ધ છે અને હાલમાં ૩૦ ટકા વેન્ટિલેટર પર દર્દીઓ સારવાર લઈ રહ્યા છે.
મહાનગર પાલિકા વિસ્તારમાં ૮૮૦ ટીમો આરોગ્ય વિષયક ઘર સર્વેક્ષણ કરી રહી છે અને ૩૪ ધન્વંતરિ રથો આરોગ્ય સંભાળ લઈ રહ્યાં છે.
તેમણે નાગરિકોને અનુરોધ કરતાં જણાવ્યું કે શહેરમાં કોવિડ કેસો ઝડપથી વધી રહ્યાં છે ત્યારે નાગરિકો જરૂરી તમામ તકેદારીઓ અને સાવચેતીઓનું ચુસ્ત પાલન કરીને સહયોગ આપે.
ખાસ ફરજ પરના અધિકારી આવતીકાલ શુક્રવારના રોજ સવારના ૧૧ વાગે ગોત્રી અને ૧૨.૧૫ વાગે સયાજી હોસ્પિટલની મુલાકાત લઈને પરિસ્થિતિ ની સમીક્ષા કરશે.તેઓશ્રી બપોરબાદ ૪ વાગે સયાજી હોસ્પિટલના ઓડીટોરિયમ માં મુખ્ય ખાનગી હોસ્પિટલોના પ્રતિનિધિઓ સાથે બેઠક યોજશે.
તે પછી સાંજના ૬ વાગે સર્કિટ હાઉસમાં શહેર પોલીસ કમિશ્નર, કલેકટર અને મ્યુનિસિપલ કમિશ્નર સાથે બેઠક યોજીને કોવિડ ગાઈડ લાઈનના પાલનને વધુ સઘન બનાવવા અંગે વિચાર વિમર્શ કરશે.